सावित्री-जिजाऊ दशरात्रोत्सव

Sunday, January 2, 2011

आज क्रांतीज्योती सावित्रीआई जयंती,विनम्र अभिवादन..

खामगावात सावित्री-जिजाऊ दशरात्रोत्सव

सांगलीत ३ जानेवारीपासून सावित्री-जिजाऊ दशरात्रोत्सव

सांगली, २९ डिसेंबर / प्रतिनिधी
मराठा सेवा संघप्रणीत जिजाऊ ब्रिगेडच्या वतीने क्रांतिज्योती सावित्रीबाई फुले व राजमाता जिजाऊ यांच्या जयंतीनिमित्त दि. ३ ते १२ जानेवारी या कालावधीत सलग दहा दिवस सावित्री-जिजाऊ दशरात्रोत्सव कार्यक्रमाचे आयोजन करण्यात आल्याची माहिती जिजाऊ ब्रिगेडच्या जिल्हाध्यक्षा श्रीमती आशा पाटील यांनी दिली.
सोमवार, दि. ३ जानेवारी रोजी दुपारी तीन वाजता माजी राज्यमंत्री अजित घोरपडे यांच्याहस्ते या सावित्री-जिजाऊ दशरात्रोत्सव कार्यक्रमाचे उद्घाटन होणार आहे. त्याचदिवशी श्रीमती स्वाती शिंदे-पवार ‘२१ व्या शतकातील महिला’, दि. ४ जानेवारी रोजी संभाजी ब्रिगेडचे जिल्हाध्यक्ष डॉ. कैलास पाटील ‘महिलांचे उद्योग व मार्गदर्शन’, तर दि. ५ जानेवारी रोजी गौतम पाटील ‘महाराष्ट्रीय लोककला’ या विषयावर मार्गदर्शन करणार आहेत. दि. ६ जानेवारी रोजी महिलांसाठी वक्तृत्व स्पर्धा, तर दि. ७ जानेवारी रोजी आयोजित आरोग्य शिबिराचे उद्घाटन सोनिया मदन पाटील यांच्या हस्ते होणार आहे. या आरोग्य शिबिरात दात, हाडांचा ठिसूळपणा व हिमोग्लोबीन तपासणी केली जाणार आहे. त्यानंतर रक्तदान शिबिर घेण्यात येणार आहे.
शनिवार, दि. ८ जानेवारी रोजी १० ते १४ या वयोगटातील विद्यार्थी- विद्यार्थिनींसाठी चित्रकला स्पर्धा घेण्यात येणार आहेत. दि. ९ जानेवारी रोजी मराठा समाजातील मुला-मुलींसाठी वधू-वर मेळावा होणार आहे. दि. १० जानेवारी रोजी अ‍ॅड. शोभा चव्हाण ‘कायदा’ या विषयावर मार्गदर्शन करणार असून दि. ११ जानेवारी रोजी ‘स्वसंरक्षण’ या विषयावर महाविद्यालयीन विद्यार्थिनींसाठी वक्तृत्व स्पर्धा होतील. बुधवार, दि. १२ जानेवारी रोजी ऐश्वर्या प्रतीक पाटील यांच्या हस्ते पारितोषिक वितरण कार्यक्रम होणार असल्याचेही श्रीमती आशा पाटील यांनी सांगितले.

जिजाऊ-सावित्री व्याख्यानमाला 2010 Nilanga

महापुरुषांना जातीच्या चौकटीत बंदिस्त करू नका - बनबरे

निलंगा, ८ जानेवारी/वार्ताहर
लोककल्याणकारी व समतेचे राज्य निर्माण करण्यासाठी अनेक महापुरुषांनी आपले आयुष्य खर्ची घातले आहे. गौतम बुद्ध, छत्रपती शिवाजी महाराज, बसवेश्वर, महात्मा फुले, अण्णाभाऊ साठे, शाहू महाराज, डॉ. बाबासाहेब आंबेडकर अशा महापुरुषांनी मानवाच्या मुक्तीसाठी लढा दिला आहे. त्यामुळे संकुचित विचाराच्या मानसिकतेतून महापुरुषांना जातीच्या चौकटीत बंदिस्त करू नका, असे आवाहन लेखक गंगाधर बनबरे यांनी केले.
मराठा सेवा संघ, संभाजी ब्रिगेड, जिजाऊ ब्रिगेड व वीर भगतसिंग विद्यार्थी परिषद यांनीफार्मसी महाविद्यालयात जिजाऊ-सावित्री व्याख्यानमाला आयोजित केली आहे. त्यात श्री. बनबेरे बोलत होते. व्याख्यानमालेचे उद्घाटन जिल्हा परिषद अध्यक्ष पंडितराव धुमाळ यांच्या हस्ते करण्यात आले. अध्यक्षस्थानी प्राचार्य व्ही. एल. एरंडे होते. प्रमुख पाहुणे म्हणून लिंबराज सूर्यवंशी, श्रीमती वनीता काळे उपस्थित होत्या.
श्री. बनबरे म्हणाले की, महापुरुषांच्या विचारामुळे अनेक राष्ट्रे विकसित झाली; परंतु ज्यांच्या शरीरात महापुरुषांचे रक्त आहे, तो भारतीय शेतकरी आत्महत्या करत आहे ही बाब खेदजनक आहे. बहुजन समाजातील भावनिक संघर्षांचे मूळ अज्ञानात आहे त्यामुळे ताकद असूनही मस्तक नसल्याने बहुजन गलितगात्र झाला आहे. बहुजनांची विद्येची देवता सरस्वती नसून सावित्री आहे. कारण फुले दांपत्यामुळेच बहुजन समाज शिक्षणाच्या मुख्य प्रवाहात आला आहे. मराठा बहुजन समाजाला खरा शत्रू कोण, हे न समजल्याने तो आपसातच संघर्ष करीत आहे. आगामी लढाई ढाल, तलवारीची नसून बुद्धीची आहे हे ओळखून शिक्षणाची कास धरावी, असेही ते म्हणाले.
श्री. धुमाळ, प्राचार्य एरंडे यांचीही भाषणे झाली. प्रास्ताविक एम. एम. जाधव यांनी, सूत्रसंचालन प्रा. हंसराज भोसले यांनी केले. दिलीप धुमाळ यांनी आभार मानले.

Saturday, January 3, 2009

सावित्री जिजाऊ दशरात्रोत्सव ३ ते १२ जानेवारी

shivdharma,jijau-savitri janmotsav,sindkhedraja,sambhaji brigade,maratha seva sangh

Savitriaai Janmotsav 3rd January

खंडाळा तालुक्यातील नायगाव येथे 'सावित्रीबाई फुले यांचा १८०वी जयंती सोहळा' व 'भारतीय स्त्री मुक्ती दिन' समारंभ सोमवार, ३ जानेवारी रोजी सकाळी दहा वाजता होत आहे.

या कार्यक्रमाला मुख्यमंत्री पृथ्वीराज चव्हाण, उपमुख्यमंत्री अजित पवार व सार्वजनिक बांधकाम मंत्री छगन भुजबळ उपस्थित राहणार असल्याची माहिती नायगावचे सरपंच राजेंद नेवासे यांनी दिली.

सावित्रीबाई फुले यांचे नायगाव हे जन्मगाव असून, दरवर्षी येथे हा सोहळा आयोजित केला जातो.

'राजमाता जिजाऊ' साहेबांची अभिमानदर्शी चरित कहाणी. मराठी पडद्यावर प्रथमच.

मराठी चित्रपटांत सध्या वेगवेगळे विषय सक्षमपणे हाताळले जात आहेत. पण सध्याच्या या वाटचालीत ऐतिहासिक चित्रपटाची निर्मिती करणे हे एक धाडसच आहे. आणि हे धाडस आहे नगर जिल्ह्यातील सौ. मंदाताई शरदराव निमसे, आपल्या जिजाई चित्र, शिर्डी या चित्रपट निर्मिती संस्थेचे. या संस्थेअंतर्गत 'राजमता जिजाऊ' या ऐतिहासिक चित्रपटाची निर्मिती करण्यात येत आहे. चित्रपटाचे दिग्दर्शक यशवं भालकर, निर्मात्या सौ. मंदाताई निमसे, शरदराव निमसे आणि चित्रपटात जिजाऊंची भू

मिका साकारणार्‍या प्रा. डॉ. स्मिता देशमुख यांनी राष्ट्रपती प्रतिभाताई पाटील यांची भेट घेतली. निर्मितीसंस्थेतर्फे त्यांना राजमाता जिजाऊंचे स्मृतीचिन्ह दिले. साहसी आणि दैदिप्यमान चरित्रशिल्प घडविणार्‍या जिजाऊंवर चित्रपटनिर्मिती करण्याच्या धाडसाचे कौतुक राष्ट्रपतींनी केले. कथानकाविषयी जाणून घेऊन शिवाजीच्या व्यक्तीरेखेसंदर्भात विचारणा केली व सर्वांना शुभेच्छा दिल्या.

गेली १५ वर्षांपासून बुलढाण्याच्या प्रा. डॉ. स्मिता देशमुख या 'मी जिजाऊ बोलतेय...' या एकपात्री नाटकाचा प्रयोग करत आहेत. फेब्रुवारी अखेरीस चित्रपटाच्या चित्रीकरणाला सुरुवात होणार असून पहिले सत्र फलटनच्या वाडयात तर दुसरे भोरच्या वाडयात होईल. बाबासाहेब सौदागर यांनी लिहिलेल्या, शशांक पोवर यांनी संगीतबद्ध केलेली कैलाश खेर आणि सुरेश वाडकर यांच्या आवाजातली गाणी रेकॉर्ड झाली आहेत. मदन पाटील यांच्या जिजाऊ साहेब कादंबरीवर आधारीत या चित्रपटाची पटकथा आणि संवाद प्रताप गंगावणे यांनी लिहीले आहेत. चित्रपटासाठी नितीन देसाई यांनी कला दिग्दर्शन केले आहे. कार्यकारी निर्मात्याची जबाबदारी राहूल खंडारे यांच्याकडे असून प्रसिद्धीची सूत्रे भूपेंद्रकुमार नंदन करत आहेत.

रमाबाईंच्या जीवनावरील चित्रपट प्रदर्शित

भारतरत्न डॉ. बाबासाहेब आंबेडकर यांच्या पत्नी रमाबाई यांच्या जीवनावरील मराठी चित्रपटाचे येथील समर्थ चित्रपटगृहात समारंभपूर्वक प्रदर्शन सुरू करण्यात आले. साईनाथ चित्र निर्मित या चित्रपटाचे निर्माते-दिग्दर्शक प्रकाश जाधव, डॉ. बाबासाहेब आंबेडकर यांची भूमिका करणारे अभिनेते गणेश जेठे, रमाबाईंच्या छोटय़ा बहिणीची भूमिका करणारी सायली विलनकर व मीराची भूमिका करणाऱ्या स्नेहल विलनकर, छायाचित्रकार त्रिलोकी चौधरी यांच्या उपस्थितीत येथील निवासी उपजिल्हाधिकारी सोनप्पा यमगर यांनी दीपप्रज्वलन व बाबासाहेब आंबेडकर यांच्या प्रतिमेस अभिवादन करून चित्रपटाच्या प्रदर्शनाचा शुभारंभ केला. या वेळी क्रांती थिएटरचे संस्थापक नगरसेवक अमर गायकवाड, रिपब्लिकन पार्टी ऑफ इंडियाचे जिल्हाध्यक्ष अशोक गायकवाड, जिल्हाधिकाऱ्यांचे मुख्य सचिव तहसीलदार विकास खरात आदी मान्यवर उपस्थित होते.निवासी उपजिल्हाधिकारी सोनप्पा यमगर या प्रसंगी म्हणाले, युगपुरुषाची पत्नी रमाबाई आंबेडकर यांनी प्रचंड त्यागपूर्ण जीवन जगून बाबासाहेबांचे उत्तुंग जीवन घडविण्यास परिश्रमपूर्वक मदत केली व अशा रमाबाई घराघरात आजही आहेत. परंतु बाबासाहेबांसारखा महापुरुष एकमेव आहे. रमाबाईंच्या जीवनावरील चित्रपट अनेक आंबेडकर निर्माण करण्यासाठी प्रेरणादायी ठरेल. अशोक गायकवाड यांनीही रमाबाईंच्या त्यागाच्या पाठिंब्यावरच बाबासाहेबांचे मोठेपण उभारले असल्याचे सांगितले. ‘रमाई’ चित्रपटाचे निर्माते प्रकाश जाधव यांनी सांगितले की, आपण अनेक मराठी चित्रपटांचे संकलन केल्यानंतर प्रथमच या चित्रपटाच्या निर्मिती-दिग्दर्शनाच्या क्षेत्राकडे वळलो आहे. मराठवाडय़ात २६ डिसेंबरपासून हा चित्रपट प्रदर्शित करण्यात आला आहे. त्याठिकाणी त्यास लोकांनी चांगला प्रतिसाद दिला आहे. थोर पुरुषांच्या पाठीमागे रमाबाईंसारख्या स्त्रिया खंबीरपणे उभ्या राहिल्यानेच इतिहास घडलेला आहे. त्यामुळे प्रत्येक स्त्रीने हा चित्रपट पाहिला पाहिजे. डॉ. बाबासाहेब आंबेडकर यांची भूमिका करणारे गणेश जेठे यांनी सांगितले, की आपण रंगभूमीवर अनेक नाटकांतून कामे केली. टीव्ही सीरियलमधील कामानंतर प्रथमच मराठी चित्रपटात काम करण्याची संधी एक आव्हान म्हणून स्वीकारली व ती यशस्वीपणे पार पाडली आहे. बाबासाहेब म्हणून लोकांकडून आता आपले स्वागत होत आहे. ही समाधानाची बाब आहे. डॉ. जब्बार पटेल यांचा डॉ. बाबासाहेब आंबेडकरांच्या जीवनावरील चित्रपट गाजला आहे. परंतु तो मुद्दाम पाहिला नाही. त्यामुळे त्या चित्रपटातील मामुटीने वठवलेल्या भूमिकेचे सावट मी माझ्या भूमिकेवर पडू दिलेले नाही, असे गणेश जेठे यांनी सांगितले. रमाबाईंची प्रधान भूमिका निशा परुळेकर यांनी केली आहे. देव चौहाण यांचे संगीत, डी. बी. सकपाळ व नितीन नीलेश यांची गीते, निर्माते प्रकाश जाधव यांची पटकथा व पाश्र्वगायन शकुंतला जाधव, नंदेश उमप, विजय सरतापे यांचे आहे. डॉ. बाबासाहेब आंबेडकर यांच्या सार्वजनिक, सामाजिक, राजकीय कारकीर्द व शैक्षणिक उंची गाठण्याच्या कालावधीत रमाबाईंनी कायम एकाकीपणे कुटुंबाचा गाडा सांभाळून, आयुष्यभर हालअपेष्टा सोसून त्याग केला. त्याचे दर्शन या चित्रपटाद्वारे प्रथमच समाजासमोर येत असल्याचे प्रकाश जाधव यांनी सांगितले.